فادي ملاك : "مصر خط أحمر.. رسالة دمياط واضحة: تنميتنا مستمرة ومش هننجر لقصص مش قصتنا!

فادي ملاك في مشاركه علي وسائل التواصل الاجتماعي

“في وقت المنطقة كلها بتغلي على جمر، والعالم كله بيحبس أنفاسه مع كل شرارة توتر، بتيجي مصر عشان تثبت للجميع إن الكبير كبير بعقله ورؤيته قبل أي حاجة.

اللي بيحصل في ميناء دمياط اليومين دول ومشروعات التطوير والتأمين اللي شغالين عليها على أعلى مستوى، مش مجرد حركة تجارة وخلاص.. ده إعلان صريح إن الشريان الاقتصادي والملاحي لمصر شغال بأعلى كفاءة، وأن عين الدولة صاحية وبتحمي كل شبر وكل ميناء على أرضنا.

ومن هنا، ومن قلب الشارع والشباب اللي شايفين وفاهمين، بنأكد على حقيقة واحدة: مصر مش هتدخل حروب مش حربها، ولا هنسمح لأي طرف يجرنا لمعارك مفيش من ورائها الدمار.

جيشنا العظيم وقواتنا المسلحة اتعملوا عشان حماية حدودنا، وصون أمننا القومي، ودعم تنميتنا.. مش عشان نكون وقود لصراعات أطراف تانية. الحكمة اللي بتدار بيها البلد النهاردة هي قمة القوة؛ إنك تبني وتطور في دمياط وكل شبر في مصر، وتحافظ على استقرارك وسط عالم مولع.. ده هو الاستثمار الحقيقي في المستقبل.

رسالتنا لكل شاب مصري: ثق في بلدك، واعرف إن قيادتك صاحية وفاهمة كويس أوي إمتى تستخدم القوة وإمتى تبني، والأهم.. إن مصر دايماً أولاً!