اكتشف شغفك.. الطريق لحياة شبهك
بقلم: د. هشام فضل – استشاري تنمية المهارات الشخصية
تعلم أي مهارة بيبدأ بقرار من جواك إنك عايز تتعلمها. واكتشاف الشغف مش استثناء؛ لازم تقرر إنك تفهم نفسك وتدور على الحاجة اللي بتحبها.
عمرك سألت نفسك: أنا فعلًا عايز إيه من الحياة؟ هل الطريق اللي ماشي فيه هو اختيارك، ولا مجرد طريق اختارهولك غيرك؟
كتير مننا بيقضي سنين في شغل أو دراسة مش بيحبها، وبينسى يسأل نفسه: إيه اللي بيسعدني فعلًا؟
الشغف مش حاجة لازم تكون عارفها من البداية، لكنه بيتكشف مع التجربة وفهم النفس.
إزاي تكتشف شغفك؟
راقب الحاجات اللي بتشد انتباهك، والأنشطة اللي بتحب تعملها، والمهارات اللي نفسك تتعلمها.
وخلي بالك من إحساسك بالوقت. لو لقيت نفسك مندمج في حاجة، وفجأة اكتشفت إن ساعات عدّت من غير ما تحس، فدي علامة تستحق الاهتمام. ممكن تكون الحاجة دي قريبة من شغفك، أو بتكشف لك عن موهبة جواك لسه ما اكتشفتهاش.
ماتكتفيش بالتفكير، لكن جرّب. لو بتحب الكتابة، اكتب. ولو بتحب التدريب، جرّب تقدم جلسة. التجربة هتساعدك تعرف إذا كانت الحاجة دي مناسبة ليك فعلًا.
تمرين عملي لاكتشاف شغفك
هات ورقة وجاوب عن 3 أسئلة:
1. إيه الحاجة اللي بحب أعملها؟
2. إيه المهارة اللي بعرفها أو نفسي أتعلمها؟
3. إيه الأثر اللي نفسي أسيبه في حياة الناس؟
اختار فكرة من إجاباتك، وخصص ساعة خلال الأسبوع الجاي لتجربتها.
بعدها اسأل نفسك: هل استمتعت؟ هل حبيت أتعلم أكتر؟ وهل حسيت إن الوقت عدى بسرعة؟
مش لازم تكتشف شغفك من أول تجربة. كل تجربة هتساعدك تفهم نفسك أكتر.
ويا بخت اللي شغفه هو لقمة عيشه؛ لأنه بيشتغل عشان يكسب، وفي نفس الوقت بيستمتع باللي بيعمله. لكن مش شرط شغفك يكون مصدر دخلك، المهم تلاقي له مكان في حياتك.
كلمة أخيرة
لو لسه مش عارف شغفك، ماتقساش على نفسك. ابدأ بخطوة صغيرة، وراقب الحاجات اللي بتثير فضولك وبتخليك عايز تتعلم أكتر.
ماتقضيش عمرك بتحاول تكون الشخص اللي الناس عايزاك تكونه، وتنسى الشخص اللي إنت بتحلم تكونه.
مش لازم تعرف طريقك كله من البداية، لكن لازم تاخد القرار وتبدأ تدور عليه؛ لأن اكتشاف شغفك هو أول خطوة لحياة ليها معنى وشبهك فعلًا.
