مقالتنا انهاردة عن موضوع
الشخصية الوسواسية القهرىة
Obcessive Copmulsive Personality Disorder (OCPD)
وعشان نعرف معلومات اكتر عنه قابلنا د.محمد سعد في عيادة توازن للصحة النفسية وسألناه
السؤال الاول ممكن حضرتك تكلمنا عن الشخصية الوسواسية القهرىة ؟
ايه الاسباب اللى بتؤدى لظهور الشخصية دى؟وايه الاعراض بتاعتها؟
الشخصية دى مفتاحها المثالية
المثالية في التربية مثلا بتؤدى لإن الطفل اللى بيتربى على انه يحاسب على كل خطأ صغير او كبير او كل درجة ينقصها ف الامتحان او غيره وخصوصا لما يصاحب دا عنف من الابوين او ضرب او عقاب مبالغ فيه
فكل دى عوامل بتخلى الطفل ياخد قرار على مستوى العقل اللاواعى انه مش عايز يغلط وعايز يعمل كل حاجة صح
طبعا فيه عوامل تانية وعمليات نفسية داخلية بس دى أهمها في وجهة نظرى
الاعراض بردو ممكن نفهمها في نفس سياق التفكير المثالى
فالشخصية دى بتهتم جدا بالتفاصيل سواء في الناس والاشياء اللى حواليها او في المهام اللى بتعملها
وبالتالي بتتردد قبل ما تاخد اى قرار لأنها عايزة تعمل كل حاجة بشكل مثالى فبتسأل اللى حواليها وبتاخد وقتها بزيادة وبتكره التغيير وبتحب منطقة الراحة ومتحبش تعمل حاجة جديدة
وبالتالي بتحب التأجيل
واحيانا كتير بينتقد اللى حواليه لما بيلاقى تفاصيل مش عاجباه مهما كانت صغيرة وهامشية
وبتلاقيه كتير بيغرق في التفاصيل وينسى الصورة الكبيرة والهدف والمعنى
ولأنه بيفكر بمثالية فبيبقى عايز يعمل كل حاجة بنفسه وصعب يفوض حد يعمل حاجة مكانه لأنه مش هيقدر يعملها زيه
وبالتالي ممكن يتعصب ويتنرفذ لو حاجة معجبتهوش او كانت غير توقعاته
وكمان فيه ملاحظة مهمة جدا بخصوصه
البخل فى الفلوس والمشاعر
يعنى ايه
يعنى ممكن يبخل على نفسه ويستخسر يجيب حاجة لنفسه حتى لو كان كريم مع اللى حواليه
ومبيعبرش عن مشاعره بسهولة لدرجة ان ممكن شريكه يحس ببرودته معاه
وطبعا لأنه مثالى فمبيحبش يصرف الا على الحاجة العملية واللى تساوى قيمتها في وجهة نظره
والقيمة عنده بتبقى للشغل والتعليم بشكل كبير فبتلاقيه بيقضى اغلب وقته في الشغل ومتكونش ليه حياة اجتماعية كويسة
ومبيكونش عنده قيمة للترفيه عن النفس وممكن يعتبر دا تضييع وقت
طبعا مش كل الشخصيات دى كدا مش كل الشخصيات دى كدا وبعضهم وبعضهم بيبقوا مختلفين في نقطة الفلوس لكن نقطة الفلوس لكن غالبا بيكون فيهم اكتر من صفة من الصفات اللى فاتت
الشخصيات دى بتتميز بتصرف بيكون في اغلبهم وهو ما نسميه الاكتناز
وهو الاحتفاظ بأشياء ومتعلقات قديمة حتى لو ملهاش لزمة او حاجة
زى ميداليات قديمة او هدوم او موبايلات او ورق وميرضاش يرمى حاجة الا بصعوبة
ومع كل اللى فات دا فالشخصيات دى بتحس بينها وبين نفسها انها مقصرة وبتلوم نفسها كتيرومع كل اللى فات دا فالشخصيات دى بتحس بينها وبين نفسها انها مقصرة وبتلوم نفسها كتير وثقتها بنفسها ممكن جدا تكون مهزوزة حتى لو مظهرش عليهم دا او مقالوهوش
طيب والشخصيات دى هل بتتعالج؟وهل بيكون فيه مشاكل بينها وبين اللى حواليهم؟
طبعا
بالنسبة للمشاكل فأكيد
لكى أن تتخيلى شخصية عصبية وعنيدة وبتهتم بالتفاصيل ومبتصرفش الا على اللى يهمها
للأسف بيكونوا شاطرين جدا في الدراسة والشغل انما في الاجتماعيات بيكون فيه صدامات كتير بينهم وبين اللى حواليهم لدرجة ان ممكن يعتبروهم شخصيات نرجسية لأنهم مش فاهمين بيفكروا ازاى
بالنسبة للعلاج فخلينا نتكلم الأول عن الشخصيات دى بتيجى العيادة تعانى من ايه
أولا من المضاعفات والامراض المصاحبة ليها بيكون الاكتئاب والقلق
ودا سهل فهمه من وجهة نظرهم فهم اما قلقانين من المستقبل انه ميكونش مثالى زى طموحاتهم العالية او بيلوموا نفسهم عالماضى على حاجات متستاهلش
وممكن ييجوا يشتكوا من اعراض وسواس قهرى بسيطة
او ممكن ييجوا نتيجة صدامات معشريك حياتهم فبيطلبوا المساعدة في الارشاد الزواجى
او لمعاملتهم القاسية مع أولادهم…وهكذا
بالنسبة للعلاج ففيه خيارات كتيرة لكن المهم يتشخصوا صح
أحيانا بنحتاج علاج دوائى خصوصا لو فيه امراض مصاحبة لكن اللى بنحتاجه دايما هو جلسات العلاج النفسي
وبنصح كل واحد اتشخص بالمرض دا انه يستعين بالمتخصصين في دا وبربنا طبعا اولا واخيرا
وأخيرا تقدروا تنورونا في عيادتنا وأي حد عنده ظروف مادية فمش هتمنع ابدا من علاجه واحنا هنحاول علي قد مانقدر كفريق عيادة اطباء واخصائيين نساعده
وبنقدم جلساتنا في العيادة اونلاين كمان عشان لو الشخص بعيد عننا
ودا عنوان عيادة توازن للصحة النفسية
القاهرة،مصر الجديدة
عمارة ٦ شارع عبد الله نور (ناصية بنك QNB)المتفرع من الميرغني (خلف زلط ولطفي) الدور الارضي المدخل الخاص شقة رقم ١ مكرر ، بجوار نادي هليوبوليس
عند تقاطع الخليفة المأمون مع شارع الميرغني
اقرب محطة مترو هي مترو كلية البنات
وللتواصل مع العيادة
01050888774
حسابات العياده علي مواقع التواصل
فيس بوك
https://www.facebook.com/BalanceMentalHealthAcademyAndClinic
يوتيوب
https://www.youtube.com/@Balance.mental
انستجرام
https://www.instagram.com/balance_mental.health
تيك توك
