إدمان الاستغناء.. عندما يتحول الخوف من الخذلان الى رفض للاحتياج !! بقلم دكتورة آية محمد
إدمان الاستغناء.. عندما يتحول الخوف من الخذلان الى رفض للاحتياج !!
بقلم دكتورة آية محمد
استشاري الصحة النفسية والنفس الإكلينيكي
فيه فرق كبير بين إنك تكون شخص مستقل وبين إنك توصل لمرحلة ترفض فيها الاحتياج لأي حد حتى لو كنت محتاجه فعلًا
أحيانًا الإنسان مش بيختار الاستغناء لأنه قوي لكنه بيتعلمه بعد تجارب خذلان متكررة أو بعد ما يطلب الدعم وما يلاقيهوش أو يعبّر عن احتياجه ويتقابل بالتجاهل
ومع الوقت بيبدأ يبني جدار حوالين نفسه ويقنع نفسه إنه مش محتاج اهتمام ولا سؤال ولا احتواء ولا حتى وجود حد جنبه
والمشكلة إننا أحيانًا بنخلط بين 3 مفاهيم مختلفة
الاستقلال النفسي
إنك تعرف تعتمد على نفسك وتتحمل مسؤولياتك
الاكتفاء النفسي الصحي
إنك تكون متصالح مع نفسك وتقدر تحب وجود الآخرين من غير ما تربط قيمتك أو سعادتك بوجودهم
الاستغناء الدفاعي
إنك ترفض الاحتياج أو القرب مش لأنك مش محتاج لكن لأنك خايف تتخذل أو تتوجع من جديد
وهنا بنكتشف إن بعض أشكال الاستغناء مش دليل قوة لكنها ممكن تكون وسيلة دفاع ضد ألم قديم
والأخطر إن الإنسان ممكن يوصل لمرحلة يرفض فيها المساعدة حتى لما تكون متاحة ويعتبر القرب تهديدًا والاهتمام عبئًا والتعبير عن الاحتياج ضعفًا
لكن الحقيقة إن الاحتياج الإنساني مش عيب وإن قبول الحب والدعم مش معناه إنك ضعيف أو معتمد على غيرك
وفي النهاية
مش مطلوب منك تستغنى عن كل الناس علشان تثبت إنك قوي ولا مطلوب منك تتعلق بحد علشان تحس بالأمان
القوة الحقيقية إنك تعرف تعتمد على نفسك وفي نفس الوقت تسمح لنفسك تحب وتتقبل الحب وتطلب الدعم من غير خوف أو خجل
فاسأل نفسك بصدق
هل أنا فعلًا مكتفي بنفسي ولا أنا اتوجعت لدرجة إني بقيت بخاف أحتاج حد
لأن أحيانًا أصعب أنواع الوحدة مش إنك تكون لوحدك لكن إنك تكون محتاج حد وتفضل تقنع نفسك إنك مش محتاجه
للاستشارة والتواصل
01001065429
